آخرین مطالب
امکانات وب
یازار: استاد بهرام اسدی
نوروز بايرامي ائللريميزين آراسيندا اسگي زامانلارين يادگاري اولاراق هله ده دوام ائتمكدهدير. بو بايرام طبيعتين جانلانماسي و چؤل-چمنين يئنيدن ديريلمهسيايله علاقهداردير و بونونلا اويغون ائل آراسيندا مختلف دبلر و رسملر يارانيبدير. طبيعت جانلانيرسا و اؤز دونون دگيشيرسه ائللريميز ده بو بايرامدا اؤز دونلارين دگيشيرلر و كيچيكلي- بؤيوكلو تزه پالتار گئييرلر و اؤزلرين طبيعتايله اويغون ائديرلر. آذربايجان و عموم حالدا تورك ائللرينين بو دون دگيشمهلري يالنيز پالتاردا دگيل اونلارين معنوياتيندا دا اؤزون گؤسترير و دئمك قبيلهلريميز هم جسمي هم ده معنوي پالتارلارين دگيشيرلر و بوتون داورانيشلاريندا بو بايرامين تأثيري آيدين گؤرونور.
بايرامدا كوسولولر باريشير. اوزاق دوشنلر يادا دوشور و كين - كدورتلر گؤتورولور و بو معنوي پالتارين دگيشمگينه بير تظاهر دور. بايرامدا بؤيوكلر ايله گؤروشمك واجب ساييلير بو ايسه ائللريميزين آراسيندا بؤيوكلره اولان حؤرمتين قاباريق بير تظاهرو دور. اسگي تورك ائللري آنجاق قوجالار و آغ ساققاللارين رأيي و نظري ايله اداره اولونارميش .
تاريخي و جغرافي جهتدن باخيليرسا طبيعت ايله علاقهدار ايل بايرامي يا خود نوروز بايرامي بوتون تورك ائللرينين آراسيندا مختلف مراسملر ايله كئچيريليبدير و كئچيريلير.
ايندي گؤره ك نهدن اونون آدي فارسجادير؟ نوروز يئني گون دئمكدير و فارس اساطيرينه گؤره بو بايرام جمشيد شاهين آذربايجانا اولان سفري زاماني يارانيبدير و همين فارس اسطورهسينده ده بو بايرامين آذربايجاندا يارانديغينا دامغا وورولور و تأييد اولور. پس نئجه اولار كي آذربايجاندا و تورك ائللرينده يارانان بير بايرامين آدي فارسجا اولا؟
بورادا تورك اساطيرينه باخماغيميز گركير: تورك و آذربايجان اساطيرينده نوروز بايرامي دگيل اوغوز بايرامي گؤرسنير و بو بايرام آذربايجان توركلرينين افسانهلره قوووشموش و پيغمبرلشميش اولو حكمداري اوغوز اوغلونون يادگاري كيمي قيمتلنير.
آذربايجان اساطيرينده اوغوز اوغلونون بايرامي مطرح اولور و اوغوز اوغلو بو گون آغير و اوزون بير قيشدان قورتولور و بو قورتولماقدا اونا بركتلر اوز گتيرير و اوغوز اوغلو بو بركتلري و خئيرلري خاطرلاتماق ايچون يئمك - ايچمك وئرير و چال - چاغير يولا سالير او گوندن اوغوز طايفالاري همين گونو خاطرلاييرلار و بو گونون اوغوز بايرامي اولدوغو بورادان يارانير. سونرالار قونشو ملتلر و او جملهدن فارس خلقي (و فارس اساطيرينه باخساق جمشيد شاه آذربايجانا گلرك) اوغوز ائللرينين بو بايرامين گؤرور، بگنير و اؤز خلقي آراسينا آپاراراق اونو اؤز ديلينه اويغون اولاراق نوروز آدلانديرير.[1]
قایناق:
[1] اوغوز اوغلونون ماجراسين ايل آخير چرشنبهلر كتابي- صحيفه 57 آذر نشر -باكي 1993 ده ياخود همين كتابين كؤچورمهسينده (اورمو، ياز نشرياتي، 1382، ص90) اوخويا بيلرسينيز.
ثبت جهانی سیمرغ پرنده افسانه ای تورکان آزربایجان...برچسب : نویسنده : salariyan بازدید : 85