آخرین مطالب
امکانات وب
بهرام اسدی :
@yaznashr
بیزده¬کی انسیّته، سیز ده ماشاللاه دئیین
بیر بئله حرّیته، سیز ده ماشاللاه دئیین
بیز مدنی ملّتیک، دونیاوطن اولموشوق
بیز مدنی ملته، سیز ده ماشاللاه دئیین
بونجا مدرنیّته، سیز ده ماشاللاه دئیین
شهریمه بیر فارس گلیب فارسجا هامی دیندیریر
آز قالا ملت اونو بوینونا دا میندیریر
بیر نفرین حورمتی بیر شهری سیندیریر
بؤیله گؤزل حورمته، سیز ده ماشاللاه دئیین
اوندا انانیّته، سیز ده ماشاللاه دئیین
تهرانا بیزدن باخین گؤر نئچه میلیون گئدیب
تورکی دیلین الده¬کی ثروتی تون-تون گئدیب
دیللری تعطیل اولوب اولماغا افسون گئدیب
معنا بودور وحدته، سیز ده ماشاللاه دئیین
دیلسیز او جمعیّته، سیز ده ماشاللاه دئیین
سالمامیشیق تورکی¬نین اورتایا اوردا سسین
کشف ائدیب اونلار بیزه (رایانه-یارانه)سین
«بیز» دیله سالدیق اونو اؤزلری بیلمیر بحثین
بیزده¬کی بو خدمته، سیز ده ماشاللاه دئیین
آلدیغیمیز اجرته(!!)، سیز ده ماشاللاه دئیین
تورکی دیلین کاسلاشان توربه¬سینه فارسی دئ
قونشولارین فارسلاشان کؤرپه¬سینه فارسی دئ
گونده بیزه راستلاشان گربه¬سینه فارسی دئ
ایشدی دوشر زحمته، سیز ده ماشاللاه دئیین
سالما اونو وحشته، سیز ده ماشاللاه دئیین
باخما ایتیر اؤلکه¬ده تورکلره اصل ونسب
آدلاری آلت-اوست اولور، «وار اونا علمی سبب!!»
دونیامیز آلت-اوست اولار بیر خلیج اولسا عرب
بیزده اولان غیرته، سیز ده ماشاللاه دئیین
ائتدیگیمیز عشرته، سیز ده ماشاللاه دئیین
اؤز دده¬میزدن یئدیک، سوفره¬سینی اودلادیق
اوستونه تورپاق آتیب تئز قیراغین قاتلادیق
سرعت ایله انکشاف یوللارینی آدلادیق
بیزده¬کی بو سرعته، سیز ده ماشاللاه دئیین
بؤیله گؤزل حورمته، سیز ده ماشاللاه دئیین
ویر-ویر ائدیب «آذری»، دیلده ویریلداتمیشیق
تورکی¬دن ال چکمه¬ین اولسا خیریلداتمیشیق
ائوده ده فارس اولموشوق فارسی قیریلداتمیشیق
بیزده بو کیفیّته، سیز ده ماشاللاه دئیین
دؤنموشوک اصلیّته(!!)، سیز ده ماشاللاه دئیین
ای اسدی، باخ بیزیم فارس اولان اولادیمیز
ایندی بگنمیر بیزی، چوخ توتور ایرادیمیز
بیز قیراغین قاتلادیق، اولدو او صیادیمیز
اوندا اولان جرأته، سیز ده ماشاللاه دئیین
بیزده اولان حسرته، سیز ده ماشاللاه دئیین
بهرام_اسدی @yaznashr
ثبت جهانی سیمرغ پرنده افسانه ای تورکان آزربایجان...
برچسب : نویسنده : salariyan بازدید : 211